എളവള്ളി ഗ്രാമ പഞ്ചായത്തിൽ സൗജന്യ പിഎസ്‌സി കോച്ചിങ് തുടങ്ങി


പഞ്ചായത്ത് ഭരണ സമിതിയും കുടുംബശ്രീ സിഡിഎസും ചേർന്ന് സൗജന്യ പിഎസ്‌സി കോച്ചിങ് തുടങ്ങി. പഞ്ചായത്ത് ഓഫിസിലെ കോൺഫറൻസ് ഹാളിൽ എല്ലാ ഞായറാഴ്ചയും ഉച്ച വരെയാണ് ക്ലാസ്. വിഷയാടിസ്ഥാനത്തിൽ വിദഗ്ധരായ അധ്യാപകരാണ് കോച്ചിങ്ങിന് നേതൃത്വം നൽകുന്നത്. ആദ്യ ദിനമായ ഇന്നലെ പ്രസാദ് കാക്കശേരി ക്ലാസിന് നേതൃത്വം നൽകി.

സൗജന്യ കോച്ചിങ് ക്യാംപ് ആരോഗ്യ വിദ്യാഭ്യാസകാര്യ സ്ഥിരം സമിതി അധ്യക്ഷ ആലീസ് പോൾ ഉദ്ഘാടനം ചെയ്തു. ക്ഷേമകാര്യ ചെയർമാൻ കെ.എസ്.സദാനന്ദൻ അധ്യക്ഷത വഹിച്ചു. ജനപ്രതിനിധികളായ ലീല പരമേശ്വരൻ, നളിനി ജയൻ, ഷൈനി സതീശൻ, സിഡിഎസ് ചെയർപഴ്സൻ രാശി സുരേഷ്, വൈസ് ചെയർപഴ്സൻ സുമിത വിജയൻ എന്നിവർ പ്രസംഗിച്ചു.
"