ബ്രഹ്മകുളം സെന്റ് തോമസ് പള്ളിക്കും കപ്പേളയ്ക്കും നേരെ അക്രമം

തൈക്കാട് ബ്രഹ്മകുളം സെന്റ് തോമസ് പള്ളിക്കും കപ്പേളയ്ക്കും നേരെ ആക്രമണമുണ്ടായി.


ജനല്‍ ചില്ലുകള്‍ തകര്‍ത്തിട്ടുണ്ട്. പള്ളിയുടെ നടവാതിലിനടുത്തുള്ള നോട്ടീസ് ബോര്‍ഡുകള്‍ എറിഞ്ഞു തകര്‍ത്തനിലയിലാണ്. സംഭവവുമായി ബന്ധപ്പെട്ട് തൈക്കാട് പാന്തറയില്‍ വിവേകിനെ (25) പോലീസ് അറസ്റ്റുചെയ്തു. ഇയാള്‍ മനോദൗര്‍ബല്യമുള്ളയാളാണെന്ന് പോലീസ് പറഞ്ഞു.

പള്ളിയുടെ ഷോപ്പിങ് കോംപ്ലക്‌സിനു മുന്നില്‍ നിര്‍ത്തിയിട്ടിരുന്ന വാഴപ്പിള്ളി ഫ്രാന്‍സിസ് ബേബിയുടെ കാര്‍, തൈക്കാട് കപ്പേളയ്ക്കു സമീപം പുലിക്കോട്ടില്‍ ബാബുവിന്റെ ഓട്ടോറിക്ഷ എന്നിവയ്ക്കുനേരെയും അക്രമം ഉണ്ടായി. വാഹനങ്ങളുടെ ചില്ലുകള്‍ തകര്‍ന്നു.

ബുധനാഴ്ച പുലര്‍ച്ചെ അഞ്ചരയോടെയാണ് സംഭവം. പള്ളിയിലെ കപ്യാരെ കണ്ടപ്പോള്‍ യുവാവ് ബൈക്കെടുത്ത് പോയി. ബൈക്കില്‍ വന്ന് യുവാവ് അക്രമം നടത്തുന്ന ദൃശ്യം പള്ളിയുടെ സി.സി.ടി.വി. കാമറയില്‍ പതിഞ്ഞിട്ടുണ്ട്.

ഗുരുവായൂര്‍ സി.ഐ. കൃഷ്ണന്‍, എസ്.ഐ. സുരേഷ്, സ്റ്റേറ്റ് സ്‌പെഷല്‍ ബ്രാഞ്ച് എസ്.ഐ.മാരായ മണലൂര്‍ ഗോപിനാഥന്‍, മുരളി എന്നിവര്‍ പള്ളിയിലെത്തി പരിശോധന നടത്തി.