പാടൂർ ഹൈസ്കൂളിനടുത്ത് ഇന്നലെ രാത്രി ഓട്ടോ ടാക്സി കത്തിനശിച്ച നിലയിൽ.

പാടൂർ സെന്ററിനു സമീപം റോഡരികിൽ പാർക്ക് ചെയ്തിരുന്ന ഓട്ടോ ടാക്സി കത്തിനശിച്ചു. പാടൂർ സ്വദേശി വെങ്കിടി വീട്ടിൽ സനീഷിന്റേതാണ് ഓട്ടോടാക്സി. പാടൂർ കൈതമുക്കിൽ ഓടുന്ന അഭിനവ് ഓട്ടോടാക്സിയാണ് പൂർണമായും കത്തിനശിച്ചത്. അയൽവാസിയായ ബന്ധുവുമായി സനീഷിന് പാവർട്ടി പോലീസ് സ്റ്റേഷനിൽ കുടുംബവഴക്കുമായി കേസുണ്ടായിരുന്നു.

ഇതുമൂലമുള്ള വൈരാഗ്യമാണ് ഓട്ടോ ടാക്സിക്കു നേരെയുണ്ടായ ആക്രമണമെന്നു പോലീസിൽ നൽകിയ പരാതിയിൽ പറയുന്നു. പാവറട്ടി എസ്ഐ എസ്.അരുണിന്റെ നേതൃത്വത്തിൽ പോലീസ് സംഘവും ഫോറൻസിക് വിഭാഗം ഉദ്യോഗസ്‌ഥരും സ്‌ഥലം സന്ദർശിച്ച് കേസെടുത്ത് അന്വേഷണം ആരംഭിച്ചു. ഒന്നരലക്ഷത്തോളംരൂപയുടെ നഷ്‌ടമുണ്ടായതായി കണക്കാക്കുന്നു.

ഓട്ടോടാക്സി തീവച്ച് നശിപ്പിച്ചതിൽ പ്രതിഷേധിച്ച് പാടൂരിൽ സംയുക്‌ത ഓട്ടോ ഡ്രൈവേഴ്സ് യൂണിയന്റെ നേതൃത്വത്തിൽ പ്രതിഷേധ പ്രകടനം നടന്നു.